10.11.2013

Bayraq bayramınız mübarək!

Bu gün Azərbaycan Respublikası Dövlət bayrağının yaranmasının 95-ci ildönümüdür. Azərbaycan Respublikasının Dövlət bayrağı 1918-ci il noyabr ayının 9-da Azərbaycan Demokratik Cumhuriyyətinin qərarı ilə qəbul edilib. Sovet hakimiyyəti dövründə bayraqdan imtina edilib.

Daha sonra üç rəngli bayraq 1990-cı il noyabrın 17-də Naxçıvan Muxtar Respublikası Ali Məclisinin sədri, xalqımızın ümummilli lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiq edilmişdir. 1991-ci il fevralın 5-də Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək onu Dövlət bayrağı elan etmişdir.

Azərbaycan Respublikasının Dövlət bayrağının ilk dəfə rəsmi surətdə 1918-ci il noyabrın 9-da qəbul edilməsini nəzərə alaraq, Azərbaycan Respublikasının dövlət rəmzlərinə hörmət və ehtiramı təmin etmək məqsədi ilə Respublika Prezidenti İlham Əliyev 17 noyabr 2009-cu ildə hər il noyabr ayının 9-u tarixində Azərbaycan Respublikasının Dövlət Bayrağı Günü kimi qeyd edilməsi haqqında Sərəncam imzalamışdı.

Biz də bütün Azərbaycan xalqını Dövlət Bayrağı Günü münasibətilə təbrik edir, xalqımızın azadlıq məfkurəsinə, milli-mənəvi dəyərlərə və ümumbəşəri ideallara sadiqliyini nümayiş etdirən Azərbaycan bayrağının hər zaman zirvələrdə dalğalanmasını diləyirik.

Bayraq bayramınız mübarək!

bayraq-1